Parlament hökumətin ixtisarına razılaşdı
Gürcüstan parlamenti iyulun 5-də hökumətin strukturu ilə bağlı qanunlar paketini ikinci (sondan əvvəlki) oxunuşda qəbul edib. Novator.az-ın məlumatına görə, birləşdirmələr yolu ilə Təhsil, Elm, Mədəniyyət və İdman Nazirliyi; Məcburi Köçkünlər, Əmək, Səhiyyə və Sosial Müdafiə Nazirliyi yaradılır. Cəzaların İcrası və Probasiya Nazirliyini isə Ədliyyə Nazirliyinə birləşdirmək təklif olunur.
Qanunlar paketi Gürcüstanın yeni baş naziri Mamuka Baxtadzenin təklifidir.
İyunun 13-də Gürcüstan hökuməti istefaya gedib. Bu, Georgi Kvirikaşvilinin həmin gün baş nazir postundan ayrılmasının nəticəsi olub. Yeni hökuməti formalaşdırmaq maliyyə naziri postunu tutan 1982-ci il təvəllüdlü Mamuka Baxtadzeyə həvalə olunub. İyunun 20-də parlament yeni hökumətin tərkibini təsdiqləyib və onun proqramına xeyir-dua verib.
Gürcüstanda hökuməti 150 yerlik parlamentə azı 76 mandat əldə edən partiya formalaşdırır. 2016-cı ilin oktyabrında keçirilmiş son parlament seçkisində Gürcü Arzusu – Demokratik Gürcüstan Partiyası 115 mandat qazanaraq konstitusion çoxluq əldə edib. 2012-ci ildə qurulmuş partiya həmin ilin oktyabr ayından hakimiyyətdədir.
