Rəsmi qələbələr
Türkiyədə iyunun 24-də keçirilmiş prezident və parlament seçkilərinin nəticələri təsdiqlənib. Novator.az-ın məlumatına görə, Ali Seçki Qurumu prezident seçkisində hakim Ədalət və İnkişaf Partiyasının sədri, dövlət başçısı Rəcəb Teyyub Ərdoğanı 26 milyon 330 min 823 səslə qalib elan edib.
Cümhuriyyət Xalq Partiyasının namizədi Məhərrəm İncə 15 milyon 340 min 321 səs, Xalqların Demokratik Partiyasından Səlahəddin Dəmirtaş 4 milyon 205 min 794 səs, Yaxşı Partiyanın lideri Maral Akşener 3 milyon 649 min 30 səs, Səadət Partiyasının lideri Təməl Qaramollaoğlu 443 min 704 səs, Vətən Partiyasının lideri Doğu Perinçek 98 min 955 səs toplayıb.
Parlament seçkisini də hakim partiya udub. Ədalət və İnkişaf Partiyası 600 yerlik parlamentə 295 mandat qazanıb.
Cümhuriyyət Xalq Partiyası 146, Xalqların Demokratik Partiyası 67, Milliyyətçi Hərəkat Partiyası 49, Yaxşı Partiya 43 mandat əldə edib.
24 iyun seçkiləri ilə ölkə konstitusiyasına dəyişikliklər tam qüvvəyə minir, idarə üsulu dəyişir: baş nazir postu ləğv edilir, prezident hökumət başçısı olub kabineti formalaşdırır.
1954-cü ildə İstanbulda doğulan Rəcəb Teyyub Ərdoğan 1994-1998-ci illərdə İstanbul bələdiyyəsinin başçısı postunu tutub. 2001-ci ildə Ədalət və İnkişaf Partiyasını yaradıb. Bu partiya 2002-ci ildən təkbaşına hakimiyyətdədir. Rəcəb Teyyub Ərdoğan 2003-cü ildən 2014-cü ilədək baş nazir olub. 2014-cü ildən prezidentdir.
