Manatın 6 aylıq xərci
Dövlət Neft Fondu Mərkəzi Bankın iyun ayında keçirdiyi valyuta hərraclarında 439 milyon ABŞ dolları məbləğində vəsait satıb. Hesabat iyulun 5-də açıqlanıb.
Novator.az bildirir ki, yanvarın valyuta hərraclarında fonddan 299,1 milyon dollar, fevralın valyuta hərraclarında 364,1 milyon dollar, martın valyuta hərraclarında 647 milyon dollar, aprelin valyuta hərraclarında 802,6 milyon dollar, mayın valyuta hərraclarında 422,7 milyon dollar məbləğində vəsait alınmışdı.
2018-ci ilin altı ayı ərzində satılan valyutanın həcmi 2 milyard 974,5 milyon dollardır.
Dörd aydır Mərkəzi Bank ABŞ dollarını 1,7 manata təklif edir. Bu, manatın devalvasiyaya uğradığı 21 fevral 2015-ci ildən bəri ən uzun sürən rəsmi məzənnədir. 2015-ci il fevralın 20-də dollar banklara 0,7862 manata satılıb. Bir gün sonra Mərkəzi Bank kəskin kurs dəyişikliyinə qərar verib və rəsmi qiymət 1,05 manata yüksəlib. Dekabrın 21-də ikinci devalvasiya baş verib, rəsmi kurs 1,55 manata qalxıb.
2016-cı il 1,5610 manatla başlayıb, 1,7707 manatla sona çatıb.
2017-ci ilin fevralında ilk devalvasiyadan sonra ən yuxarı rəsmi qiymət qeydə alınıb: 1,92 manat. Dekabrın 13-dən 2018-ci il martın 7-dək isə 1,7001 manat rəsmi məzənnə qüvvədə olub.
