İpoteka ilə mənzil alan köçkünə müavinət düşürmü?
Məcburi köçkünlər və onlara bərabər tutulan şəxslər üçün vahid aylıq müavinətin ödənilməsi qaydasına görə, aylıq müavinət ayrıca yaşayış sahəsi əldə edən məcburi köçkünlərə və onlarla birlikdə yaşayan ailə üzvlərinə (Milli Qəhrəman ailələri, şəhid ailələri, I qrup Qarabağ müharibəsi əlilləri, xidməti işi ilə bağlı müvəqqəti yaşadığı ünvana daimi qeydiyyata düşən şəxslər və onlarla birlikdə yaşayan ailə üzvləri istisna olmaqla) şamil edilmir. Novator.az-a müraciət edən məcburi köçkün bu normanın ipoteka müqaviləsi ilə yaşayış sahəsi əldə edənlərə aid olub-olmadığını soruşub.
Qaçqınların və Məcburi Köçkünlərin İşləri üzrə Dövlət Komitəsindən Novator.az-a bildiriblər ki, ipoteka müqaviləsi ilə yaşayış sahəsi əldə edən məcburi köçkünə və onların ailə üzvlərinə vahid aylıq müavinət düşür: “Bundan ötrü məcburi köçkün yaşayış sahəsinin ipoteka müqaviləsi ilə əldə edildiyini təsdiqləyən sənədləri köçkün düşdüyü rayonun icra hakimiyyətinə təqdim etməlidir”.
Məcburi köçkünlər və onlara bərabər tutulan şəxslərə 40 manat məbləğində vahid aylıq müavinət müəyyən edilib. Fərdi qaydada sayğacların quraşdırılması və texniki istismarı mümkün olmayan sıx müvəqqəti məskunlaşma yerlərində faktiki yaşayan məcburi köçkünlərin istifadə etdikləri təbii qaz, elektrik enerjisi, su və məişət tullantılarının daşınmasına görə haqlar dövlət hesabına mərkəzləşmiş qaydada ödənir. Onlar üçün vahid aylıq müavinətin məbləği 22 manatdır.
