Dövlət komitəsi müraciət hesabatı verib
Əmlak Məsələləri Dövlət Komitəsi 193 çağrı mərkəzinə müraciətlərin statistikasını açıqlayıb. Məlumata görə, çağrı mərkəzi əmlakın özəlləşdirilməsi, icarəsi və istifadəsi, daşınmaz əmlak üzərində mülkiyyət hüquqlarının qeydiyyatı, torpaqların kadastr uçotu və digər məsələlərlə bağlı sualları cavablandırır: “2018-ci ilin yanvar-iyun ayları ərzində 193 çağrı mərkəzinə əksəriyyəti sorğu tipli olmaqla ümumilikdə 7132 müraciət qeydə alınıb. 6,2 mindən yuxarı sorğu tipli müraciət dərhal cavablandırılıb, 600-ə yaxın müraciətin isə araşdırılması barədə vətəndaşa məlumat verilib.
Yarım il ərzində zənglərin 79%-i paytaxt Bakıdan, qalanları bölgələrdən daxil olub. Yanvar-iyun aylarında çağrı mərkəzi hər ay orta hesabla 1,2 minə yaxın müraciət alıb. Daşınmaz əmlak üzərindən çıxarışların və arayışların alınması, dövlət rüsumu və xidmət haqqının öyrənilməsi, müraciətin icrasının yoxlanması, özəlləşmə mövzuları ilə bağlı daxil olan müraciətlər üstünlük təşkil edib.
Araşdırma tələb edən məsələlər əsasən daşınmaz əmlak üzərindən çıxarış alarkən icranın dayandırılması və sənədlər, dövlət rüsumu və xidmət haqqı, torpaq sahəsinin kadastr problemi kimi mövzuları əhatə edib. Bu kateqoriyadan müraciətlərin 57%-i paytaxtdan daxil olub”.
Çağrı mərkəzi canlı və səsli menyu rejimində olmaqla fasiləsiz fəaliyyət göstərir. Canlı rejim həftənin iş günləri saat 9:00-dan 18:00-dək həyata keçirilir. Səsli menyu rejimi isə iş vaxtından sonrakı vaxtlarda, həftənin qeyri-iş günləri və bayram günlərində fəaliyyət göstərir.
