Paytaxtda orta maaş 790 manatı haqlayıb
Bakı Şəhər Statistika İdarəsi paytaxtın sosial-iqtisadi göstəricilərini açıqlayıb. Novator.az bildirir ki, hesabata görə, 2018-ci ilin yanvar-may aylarında sənayedə istehsal olunmuş malların və göstərilmiş xidmətlərin həcmi 16,7 milyard manat təşkil edib. Sənaye məhsulunun 82,8 faizi mədən, 15,1 faizi emal, 1,6 faizi elektrik enerjisi, qaz və buxar istehsalı, bölüşdürülməsi və təchizatı, 0,5 faizi su təchizatı, tullantıların təmizlənməsi və emalı sektorlarında istehsal olunub. Qeyri-dövlət sektorunun payı hesabatda 84,3 faiz göstərilir.
Rəsmi açıqlamaya görə, beş ayda şəhərin iqtisadi və sosial sahələrinin inkişafı üçün əsas kapitala 4 milyard 669,2 milyon manat və ya əvvəlki ilin müvafiq dövrü ilə müqayisədə 14,6 faiz az vəsait yönəldilib. Ümumi sərmayənin 53 faizi dövlət, 47 faizi qeyri-dövlət sektorunun sərmayədarlarının payına düşüb.
Yanvar-may aylarında ticarət dövriyyəsinin həcmi 2017-ci ilin ilk beş ayı ilə müqayisədə 3 faiz, ictimai iaşə dövriyyəsi real ifadədə 4,4 faiz, əhaliyə göstərilən ödənişli xidmətlərin dəyəri 2 faiz artıb.
O da qeyd olunur ki, yanvar-aprel aylarında əvvəlki ilin müvafiq dövrünə nisbətən işçilərin orta aylıq nominal əməkhaqqı 1,7 faiz artaraq 789 manata yüksəlib.
