İcra başçısına qəsd 4 maddə ilə araşdırılır
İyulun 3-ü saat 20:30 radələrində Gəncə Şəhər İcra Hakimiyyətinin başçısı Elmar Vəliyev və onun mühafizəçisi Qasım Aşbazov odlu silahdan açılan atəşlə bədən xəsarətləri alaraq xəstəxanaya yerləşdiriliblər. Sui-qəsd cəhdi icra hakimiyyətinin inzibati binasının qarşısında baş verib.
Baş Prokurorluğun, Daxili İşlər Nazirliyinin və Dövlət Təhlükəsizliyi Xidmətinin birgə məlumatında bildirilir ki, cinayəti törədən Yunis Səfərovu ərazidə xidmət aparan polis əməkdaşları tutaraq tərksilah edib.
1983-cü ildə Gəncə şəhərində anadan olan Yunis Səfərova Cinayət Məcəlləsinin 29-cu, 120.2.3-cü, 120.2.7-ci (zərərçəkmiş şəxsin xidməti vəzifəsini və ya ictimai borcunu yerinə yetirməsi ilə əlaqədar qəsdən adam öldürməyə cəhd) və 228-ci (qanunsuz olaraq odlu silah əldə etmə) maddələri ilə cinayət işi açılıb.
Novator.az bildirir ki, Elmar Vəliyev 1960-cı ildə Yevlax şəhərində anadan olub. Azərbaycan Texnologiya Universitetini və Bakı Dövlət Universitetinin hüquq fakültəsini bitirib.
2004-cü ildən 2011-ci ilə kimi Yevlax Şəhər İcra Hakimiyyətinin başçısı olub. 18 fevral 2011-ci ildən Gəncə Şəhər İcra Hakimiyyətinin başçısıdır.
Yeni Azərbaycan Partiyasının üzvüdür. Ailəlidir, üç övladı var.
