Günnüt ziyarəti
Naxçıvan Muxtar Respublikası Ali Məclisinin sədri Vasif Talıbov iyulun 3-ü Günnüt kəndindəki hərbi hissədə olub, əsgər və zabitlərlə görüşüb.
Bu il mayın sonunda Şərur rayonunun Günnüt kəndi və ətrafındakı yüksəkliklər Əlahiddə Ümumqoşun Ordusunun keçirdiyi əməliyyat nəticəsində işğaldan azad edilib.
Ali Məclisin sədri 3 iyul ziyarətində əməliyyatların keçirilməsində iştirak edən hərbi hissələrin şəxsi heyətinə təşəkkür edib, Günnüt əməliyyatında iştirak edən əsgər və zabitlərə hədiyyələr verib. O, Günnüt kəndində və ətraf ərazilərdə yerləşən postlarda olub, əsgər və zabitlərlə görüşüb, xidmətin təşkili ilə maraqlanıb.
Əlahiddə Ümumqoşun Ordusunun komandanı general-leytenant Kərəm Mustafayev Ali Məclisin sədrinə müdafiənin ön xəttində xidmətin təşkili haqqında məlumat verib. Qeyd olunub ki, Əlahiddə Ümumqoşun Ordusu müdafiə zolağının Vəlidağ, Kömürlüdağ istiqamətində Axsal dağı, Qızılqaya dağı, Yağargərdik dağı, Bağırsaq dağı və Həsənqulubağ sahəsində ön xəttin dövlət sərhədi boyu əlverişli mövqeləri ələ keçirib. 26 kilometr məsafəni əhatə edən əməliyyat nəticəsində 7 kilometrədək dərinlikdə əlverişli yüksəkliklər götürülüb. Qızılqaya yüksəkliyinin ən böyük strateji əhəmiyyəti Laçından keçən Yerevan-Xankəndi avtomobil yoluna nəzarət imkanı verməsidir.
Xəbəri AZƏRTAC yayıb.
