Bakı metrosuz qalıb
İyulun 3-ü saat 19 radələrində Azərbaycanın enerji təchizatında yenidən problem yaranıb. Energetika Nazirliyi və “Azərenerji” ASC-nin birgə operativ məlumatında qeyd olunub ki, iyulun 2-də ölkənin elektrik enerjisi sistemində baş vermiş qəzanın nəticələri aradan qaldırılsa da, onun fəsadı özünü göstərir, elektrik enerjisi məhdudiyyətlə verilir.
Elektrik enerjisində yaranan fasilə ilə əlaqədar Bakı metrosu bağlanıb. Metronun stansiyalarındakı və tuneldə qalan qatarlardakı sərnişinlər çıxarılıb.
Bakı-Sumqayıt-Bakı elektrik qatarlarının hərəkətində də problem yaranıb. 3 qatar enerji fasiləsi zamanı yolda qalıb. Qatarları dartaraq ən yaxın olan Biləcəri və Bakı sərnişin vağzalına gətiriblər. Sərnişinlərin hər biri təxliyə olunub və onların ödəniş haqları geri qaytarılıb.
Bakı Nəqliyyat Agentliyinin göstərişinə əsasən bütün marşrutlar üzrə xətlərə maksimum dərəcədə nəqliyyat vasitəsi cəlb edilib.
Qatarların hərəkətini təmin etmək üçün elektrik enerjisinin verilişində dayanıqlılıq olmadığından Bakı Metropoliteni iyulun 4-də test rejimində fəaliyyət göstərir. Nəqliyyat, Rabitə və Yüksək Texnologiyalar Nazirliyi, Bakı Nəqliyyat Agentliyi və “Bakı Metropoliteni” QSC-nin birgə məlumatında qeyd olunur ki, paytaxt ərazisindəki bütün müntəzəm marşrut xətləri xüsusi rejimdə fəaliyyətini davam etdirəcək və sərnişinlərin daşınması ödənişsiz həyata keçiriləcək.
İyulun 3-də Mingəçevir şəhərində yerləşən “Azərbaycan İstilik Elektrik Stansiyası” MMC-nin yarımstansiyalarından birində cərəyan transformatorunda qəza olub. Bununla əlaqədar Bakı və Gəncə şəhərləri də daxil olmaqla ölkənin 39 şəhər və rayonunun elektrik enerjisi ilə təminatında fasilə yaranıb.
