Vahid Ələkbərov 6 ayda nə qədər varlanıb?
Rusiyanın 24 milyarderinin 2018-ci ilin ilk 6 ayı üzrə varidatı açıqlanıb. Novator.az-ın məlumatına görə, varidatı artanlar siyahısında “Lukoyl” şirkətinin azərbaycanlı prezidenti Vahid Ələkbərov da var. Onun 14,5 milyard dollarlıq ümumi varidata sahib olduğu bildirilir.
Milyarderlər siyahısında 7-ci yerdə olan Vahid Ələkbərovun varidatı 6 ayda 1 milyard 92 milyon dollar çoxalıb.
Rusiyanın ən varlı adamı “Novatek” qaz şirkətinin idarə heyətinin sədri və “Sibur” neft-kimya holdinqinin səhmdarı Leonid Mixelsondur. Onun var-dövləti 6 ayda 2 milyard 23 milyon dollar artaraq 18,9 milyard dollara çatıb.
Siyahıda ikinci yerdə “Severstal”ın əsas səhmdarı, qara metallurgiya və maşınqayırma üzrə biznesmen Aleksey Mordaşov gəlsə də, onun var-dövləti 6 ayda 804 milyon dollar azalıb. Aleksey Mordaşov 18,9 milyard dollarlıq varidat sahibidir.
Üçüncü yerdə metallurgiya, nəqliyyat sahəsi üzrə biznesmen Vladimir Lisin qərarlaşıb. Biznesmen 2018-ci ilin ilk yarısında var-dövlətinin həcmini 475 milyon dollar artıraraq 18,5 milyard dollara yüksəldib.
Siyahıda dördüncü yerdə “Norilskiy nikel” şirkətinin prezidenti Vladimir Potanin gəlir. 2018-ci ilin yanvar-iyun aylarında onun varidatı 674 milyon dollar azalaraq 18,3 milyard dollar olub.
Reytinq cədvəlinin beşinci pilləsində “Yevroxima” şirkətinin sahibi Andrey Melniçenko qərarlaşıb. O, 2018-ci ilin ilk 6 ayında öz kapitalını 1 milyard 62 milyon dollar artıraraq 15,4 milyard dollara çatdırıb.
Səidə Hüseynova
