Aparatdakı yeniliklər
Novator.az Nazirlər Kabineti Aparatının strukturundakı yeniliklərə nəzər salıb. Ötən il avqustun 23-də prezident İlham Əliyevin imzaladığı fərmanla Nazirlər Kabineti Aparatında 14 şöbə vardı. Hazırda Nazirlər Kabinetinin rəsmi saytında 9 şöbənin adı yer alır. 8 şöbə əvvəlki kimi saxlanıb:
Hüquq şöbəsi
Maliyyə və iqtisadiyyat məsələləri şöbəsi
Humanitar və sosial məsələlər şöbəsi
Beynəlxalq əlaqələr şöbəsi
Sənaye və energetika məsələləri şöbəsi
Təhlükəsizlik və müdafiə məsələləri şöbəsi
Kommunikasiya, tikinti və kommunal təsərrüfat məsələləri şöbəsi
Sənədlərlə və vətəndaşların müraciətləri ilə iş şöbəsi.
Kənd təsərrüfatı məsələləri; ekologiya məsələləri; regionların inkişafı məsələləri şöbələri birləşdirilib. Yeni şöbə regionların inkişafı, kənd təsərrüfatı və ekologiya məsələləri şöbəsi adlanır.
Neft və kimya məsələləri; beynəlxalq maliyyə təşkilatları ilə iş; qaçqınların və məcburi köçkünlərin məsələləri şöbələri ləğv edilib.
Azərbaycan Konstitusiyasında Nazirlər Kabinetinin statusu prezidentin yuxarı icra orqanı kimi müəyyən olunub. Ana qanuna görə, ölkə prezidenti icra səlahiyyətlərinin həyata keçirilməsinin təşkili məqsədi ilə Nazirlər Kabineti yaradır. Prezidentə tabe olan, onun qarşısında cavabdehlik daşıyan qurumun əsas səlahiyyətləri dövlət büdcəsinin hazırlanması və icrası, maliyyə-kredit və pul siyasətinin, dövlət iqtisadi və sosial proqramlarının həyata keçirilməsi, nazirliklərə və digər mərkəzi icra hakimiyyəti orqanlarına rəhbərlikdir.
Nazirlər Kabinetinin Aparatı ali kateqoriyalı dövlət orqanıdır. Aparat Prezident Administrasiyası və mərkəzi icra hakimiyyəti orqanları ilə qarşılıqlı əlaqəli surətdə fəaliyyət göstərir.
Nazirlər Kabinetinin Aparatı bilavasitə baş nazirə və onun müavinlərinə tabedir. Aparat rəhbərini prezidentlə razılaşdırmaqla baş nazir təyin edir.
