Mixail Saakaşvili yenə iş aldı
Gürcüstanın sabiq prezidenti Mixail Saakaşvili 6 il müddətinə azadlıqdan məhrum edilib. Novator.az-ın məlumatına görə, qiyabi hökmü iyunun 28-də Tbilisi Şəhər Məhkəməsi çıxarıb. Mixail Saakaşvili 2005-ci ildə parlamentin deputatı Valeri Gelaşviliyə edilmiş hücumun təşkilində təqsirli bilinib.
1967-ci il təvəllüdlü Mixail Saakaşvili 2004-2013-cü illərdə Gürcüstanın prezidenti olub. 2013-cü ildə Mixail Saakaşvili ölkəsini tərk edib. Gürcüstanda onun haqqında bir neçə cinayət işi qaldırılıb.
2005-ci ildə Mixail Saakaşvili dövlət başçısı postunu tutarkən Daxili İşlər Nazirliyinin əməkdaşları Tbilisidə Valeri Gelaşvilini döyüblər. Deputat ağır xəsarətlərlə xəstəxanaya düşüb. Valeri Gelaşvili hücumu Mixail Saakaşvilinin sifarişi saydığını bəyan edib. 2013-cü ildə Mixail Saakaşvili prezident postundan gedəndən sonra bu hadisə üzrə istintaq yenilənib.
Bu il yanvarın 5-də Tbilisi Şəhər Məhkəməsi Mixail Saakaşviliyə başqa bir iş üzrə qiyabi hökm çıxarıb. Sabiq prezident bankir Sandro Qirqvlianinin işi üzrə vəzifə səlahiyyətlərindən sui-istifadədə təqsirli bilinib, 3 il azadlıqdan məhrumetmə cəzası alıb.
Sandro Qirqvliani 2006-cı ildə öldürülüb. 2008-ci ildə prezident postunu tutan Mixail Saakaşvili bu ölüm işinə görə tutulmuş 4 polis zabitini əfv edib və onlar azadlığa çıxıblar. Sabiq prezidentə məhz buna görə vəzifə səlahiyyətlərindən sui-istifadə ittihamı verilib.
2015-ci ildən Ukraynada yaşayan sabiq prezident 30 may 2015-ci ildən 10 noyabr 2016-cı ilədək Odessa vilayətinin qubernatoru olub.
Sonradan Mixail Saakaşvili Yeni Qüvvələr Hərəkatı yaradaraq Ukrayna hakimiyyətinə qarşı mübarizə aparıb, bu il fevralın 12-də ölkədən deportasiya edilib. Hazırda sabiq prezident Niderlandda yaşayır.
Mixail Saakaşvilinin vətəndaşlığı yoxdur. O, 2015-ci ildə Gürcüstan vətəndaşlığından, 2017-ci ildə Ukrayna vətəndaşlığından çıxarılıb.
