Yalçın İmanov prosesi təyin olunub
Ali Məhkəmənin hüquqşünas Yalçın İmanovun şikayətinə nə vaxt baxacağı bəlli olub.
Vəkillik fəaliyyəti dayandırılmış Yalçın İmanov Ali Məhkəməyə Gəncə Apellyasiya Məhkəməsinin qərardadlarından şikayət edib. Bu il fevralın 21-də Gəncə İnzibati-İqtisadi Məhkəməsində Yalçın İmanovun vəkillik fəaliyyətinə xitam verilməsi barədə qərarın təsdiqlənməsi məsələsi üzrə ilkin baxış olub. Qərarı 2017-ci il noyabrın 20-də Vəkillər Kollegiyasının Rəyasət Heyəti çıxarıb. Rəyasət Heyəti qərarı Penitensiar Xidmət rəhbərliyinin şikayəti əsasında qəbul edib. Penitensiar Xidmətin şikayətində bildirilib ki, Yalçın İmanov hüquqlarını müdafiə etdiyi Abbas Hüseynova Qobustan həbsxanasında işgəncə verilməsi haqda yalan məlumat yayıb.
Məhkəmə baxışına qədər Yalçın İmanovun vəkillik fəaliyyəti dayandırılıb.
Gəncə İnzibati-İqtisadi Məhkəməsində ilkin baxış zamanı Yalçın İmanovun işin yaşadığı və işlədiyi Sumqayıt şəhərinə göndərilməsi barədə vəsatəti təmin olunmayıb, həmçinin Rəyasət Heyətinin 20 noyabr 2017-ci il qərarının ləğvi barədə qarşılıqlı iddiası icraata götürülməyib.
Bundan sonra Yalçın İmanov Gəncə Apellyasiya Məhkəməsinə şikayət verib. Ancaq aprelin 17-də Gəncə Apellyasiya Məhkəməsi Yalçın İmanovun şikayətini təmin etməyib.
İyunun 28-də Novator.az-a danışan Yalçın İmanov deyib ki, Gəncə Apellyasiya Məhkəməsinin qərardadlarından Ali Məhkəməyə şikayətində vəkillik fəaliyyətinə xitam verilməsi barədə işə Sumqayıt Şəhər Məhkəməsində, yaxud Sumqayıt İnzibati-İqtisadi Məhkəməsində baxılmasını və Vəkillər Kollegiyasının Rəyasət Heyətinə qarşılıqlı iddiasının icraata götürülməsini istəyib: “Ali Məhkəmə şikayətimə İnzibati-İqtisadi Kollegiyanın hakimi Nigar Rəsulbəyovanın sədrliyi ilə baxacaq. Proses avqustun 29-u saat 10:50-yə təyin olunub”.
