Azər Qasımlı həbsini necə şərh edir?
Respublikaçı Alternativ Partiyası (REAL Partiya) Məclisinin üzvü Azər Qasımlı iyunun 28-də həbsdən buraxılıb.
Bu il mayın 28-də REAL Partiyanın fəalları Bakının mərkəzində Respublika Günü münasibətilə yürüş keçiriblər. Polis aksiyanın şəhər rəhbərliyi ilə razılaşdırılmadığını bildirərək yürüşün sonadək davam etməsinə imkan verməyib.
Bunun ardınca REAL-ın bir neçə üzvü polisin qanuni tələbinə tabe olmamaqda təqsirli bilinərək inzibati həbs cəzası alıb. Azər Qasımlıya, Nəriman Mücahid İsmayıla, Ərəstun Baxşəliyevə 30 sutka, Elmin Mirzəyə 25 sutka, Anar Məmmədova 10 sutka həbs verilib.
İyunun 28-də həbsdən çıxan Azər Qasımlı Azadliq.org-a deyib ki, 30 sutkalıq cəzaya məhkum olunmağı hər hansı xəta törətməsinə görə yox, siyasi fəaliyyəti ilə bağlıdır: “Bu bizə təzyiqdir”.
Azər Qasımlı qeyd edib ki, mayın 29-da Baş Prokurorluqdan zəng vurub onu birinci müavin Rüstəm Usubovla görüşə dəvət ediblər: “Amma prokurorluqda mətbuat xidmətinin rəhbəri ilə görüşdüm. Həmin görüşdə bizim Bakı Şəhər İcra Hakimiyyətindən icazə almadan yürüş keçirməyimiz qanunu pozmağımız kimi dəyərləndirildi. Halbuki REAL Partiyanın Xocalı faciəsinin ildönümü zamanı da belə yürüşü olub. Heç bir rəsmi qurumdan da icazə almamışıq. Mətbuat xidmətinin rəhbəri xəbərdarlıq etdi ki, bir daha qanunvericiliyi pozmayaq”.
Azər Qasımlı deyir ki, bundan sonra onu 26-cı polis bölməsinə çağırıb polisə tabe olmamaq ittihamı ilə Yasamal Rayon Məhkəməsinə aparıblar: “Burada maraqlı olan bu idi ki, polis nəfərləri onları söymədiyimi dedilər və polisə müqavimət göstərmədiyimi bildirdilər. Bununla belə, mənə 30 sutkalıq inzibati cəza verildi”.
Respublikaçı Alternativ Partiyası eyni adlı ictimai-siyasi hərəkatın bazasında 2018-ci ilin aprelində təsis olunub. Təsis qurultayında partiyanın sədri vəzifəsinə həbsdə olan İlqar Məmmədov seçilib.
İlqar Məmmədov REAL Hərəkatına yarandığı vaxtdan – 2008-ci ildən rəhbərlik edib. O, 2013-cü il fevralın 4-də, İsmayıllıda hökumət əleyhinə iğtişaşlar (23-24 yanvar 2013-cü il) təşkil etmək ittihamı ilə tutulub, 7 il azadlıqdan məhrumetmə cəzası alıb.
Azər Qasımlı həbs olunub
REAL-ın daha bir üzvü həbs olunub
REAL-da üçüncü həbs
Dördüncü həbs: Ərəstun Baxşəliyev də tutuldu
Daha bir REAL-çı həbs cəzası alıb
