Torhildur Sunna kimdir?
Novator.az Avropa Şurası Parlament Assambleyasının (AŞPA) Azərbaycanda siyasi məhbus məruzəçisi Torhildur Sunna Evarsdottirin ömür yoluna nəzər salıb.
Torhildur Sunna 1987-ci il mayın 6-da İslandiyanın Akranes şəhərində anadan olub. Atası yazıçı-jurnalist, anası ekoloq-mühəndisdir.
Niderlandın Qroningen Universitetində (bakalavr) və Utrext Universitetində (magistr) hüquq təhsili alıb.
2013-cü ildən İslandiyada jurnalist fəaliyyəti ilə məşğul olub.
Torhildur Sunna İslandiya parlamentində 6 deputatla təmsil olunan Pirat Partiyasının rəhbərlərindən biridir. 2017-ci ildən AŞPA üzvüdür.
2018-ci il iyunun 25-də AŞPA-nın Hüquq və İnsan Haqları Komitəsi Torhildur Sunna Evarsdottiri Azərbaycanda siyasi məhbuslar üzrə məruzəçi təyin edib.
AŞPA-nın Azərbaycanda siyasi məhbuslarla bağlı bundan əvvəlki məruzəçisi almaniyalı deputat Kristofer Ştrasser olub. Hüquq və İnsan Haqları Komitəsi Ştrasseri 2009-cu ilin martında məruzəçi təyin edib. Lakin o, bu vəzifəni faktiki icra edə bilməyib. Ştrasser Bakıya gəlmək üçün bir neçə dəfə Azərbaycan hökumətinə müraciət etsə də, zəruri dəvəti ala bilməyib. Nəticədə o, məruzəçi olduğu dövrdə heç vaxt Azərbaycana gəlməyib. Onun Azərbaycandakı siyasi məhbuslarla bağlı hazırladığı hesabat isə AŞPA-da qəbul edilməyib. Məruzə qəbul olunmayandan sonra, elə həmin il (2013) Kristofer Ştrasser siyasi məhbuslar üzrə məruzəçi postunu tərk edib.
