Milyarderin yeni hökuməti təsdiqləndi
İyunun 27-də Çexiya prezidenti Miloş Zeman yeni hökumətin tərkibini təsdiqləyib. Novator.az-ın məlumatına görə, Andrey Babişin baş nazirlik etdiyi hökumətdə 10 nazir onun ANO (Narazı Vətəndaşlar Aksiyası) hərəkatının, 4 nazir Sosial Demokrat Partiyasının təmsilçisidir.
Koalisiya 200 yerlik parlamentdə 93 mandata sahibdir. Ona 15 deputatı olan Kommunist Partiyası da dəstək verir.
Andrey Babiş 2017-ci il dekabrın 6-da baş nazir təyin edilib. Ancaq onun hökuməti parlamentdə etimad qazana bilmədiyi üçün koalisiya danışıqları aparmağa məcbur olub.
Andrey Babiş milyarderdir. 2014-2017-ci illərdə maliyyə naziri və baş nazirin birinci müavini olub. Onun başçılıq etdiyi ANO hərəkatı ötən ilin oktyabr ayında keçirilmiş parlament seçkisində qalib gəlib.
