Ərdoğanın hökumət planları
Türkiyə prezidentliyinə namizəd, dövlət başçısı Rəcəb Teyyub Ərdoğan hökumətlə bağlı planlarını açıqlayıb. Novator.az-ın məlumatına görə, o deyib ki, prezident seçiləcəyi halda 6 nazirliyi ixtisar edəcək.
Prezidentin planı Avropa İttifaqı Nazirliyinin Xarici İşlər Nazirliyinə birləşdirilməsini nəzərdə tutur.
Plana əsasən, Əmək və Sosial Müdafiə Nazirliyi ilə Ailə və Sosial Siyasət Nazirliyi birləşdirilir. Yeni nazirliyin Əmək, Sosial Xidmətlər və Ailə Nazirliyi kimi fəaliyyət göstərəcəyi açıqlanıb.
Elm, Sənaye və Texnologiya Nazirliyi ilə İnkişaf Nazirliyini Sənaye və Texnologiya Nazirliyi adı altında bir araya gətirmək planı var.
Prezident deyib ki, İqtisadiyyat Nazirliyi ilə Gömrük və Ticarət Nazirliyi də birləşdiriləcək. Yeni nazirlik Ticarət Nazirliyi olacaq.
Qida, Kənd Təsərrüfatı və Heyvandarlıq Nazirliyi ilə Meşə və Su İşləri Nazirliyini Kənd Təsərrüfatı və Meşə Nazirliyi adı altında birləşdirmək niyyəti var.
İyunun 24-ü Türkiyədə keçiriləcək parlament və prezident seçkiləri ilə ölkə konstitusiyasına dəyişikliklər tam qüvvəyə minir. Qoşa seçkidən sonra ölkənin idarə üsulu dəyişir: baş nazir postu ləğv edilir, prezident hökumət başçısı olub kabineti formalaşdırır.
İndi Türkiyə parlament respublikasıdır, hökuməti 550 nəfərlik parlamentdə azı 276 mandatı olan partiya qurur.
Ədalət və İnkişaf Partiyası 2002-ci ildən bəri təkbaşına hakimiyyətdədir. Partiyanın lideri Rəcəb Teyyub Ərdoğan 2003-cü ildən 2014-cü ilədək baş nazir olub. 28 avqust 2014-cü ildən prezidentdir.
