AXCP üzvü həbsdə aclıq edir
AXCP üzvü Füzuli Hüseynov həbsdə aclıq edir. Bunu “Amerikanın səsi”nə vəkil Cavad Cavadov deyib.
Füzuli Hüseynov iyunun 14-də REAL Partiyanın həbsdə olan sədri İlqar Məmmədovun doğum günü münasibətilə paytaxtda təkbaşına aksiya keçirib. O, əlində İlqar Məmmədovun şəkli olan plakat tutaraq məhbus siyasətçiyə azadlıq tələb edib.
Həmin gün tutulan Füzuli Hüseynova Nəsimi Rayon Məhkəməsinin qərarı ilə 10 sutka inzibati həbs cəzası verilib. O, İnzibati Xətalar Məcəlləsinin 535.1-ci (polisin qanuni tələbinə tabe olmamaq) maddəsiylə təqsirli bilinib.
Vəkil Cavad Cavadov iyunun 21-də inzibati həbs olunanların saxlandığı Binəqədi təcridxanasında Füzuli Hüseynovla görüşüb.
Füzuli Hüseynov vəkilinə deyib ki, həbs olunandan aclığa başlayıb, 5 gün sonra sağlamlıq durumu kəskin pisləşib. Füzuli Hüseynov hələ də aclığı davam etdirdiyini söyləyib.
Cavad Cavadovun sözlərinə görə, o, Füzuli Hüseynova aclıq aksiyasını dayandırmağı tövsiyə edib: “Söz verdi ki, mənim tövsiyəmlə bağlı düşünəcək. Halsız görünürdü…”
Vəkil Füzuli Hüseynov haqqındakı inzibati həbs qərarından apellyasiya şikayəti verəcək.
Füzuli Hüseynov əvvəllər də həbsdə olan ictimai-siyasi fəalların şəkilləri əks olunmuş plakatları qaldırmaqla təkbaşına aksiyalar keçirib və həmin aksiyalara görə də inzibati qaydada həbs edilib.
