Təzə baş nazir hökuməti ixtisar edir
Gürcüstanda nazirliklərin sayı 14-dən 11-ə düşürülür. Novator.az-ın məlumatına görə, yeni baş nazir Mamuka Baxtadze belə təşəbbüslə çıxış edib. Yenilik layihəsinin parlamentdə iyul ayında təsdiqlənməsi gözlənir.
İyunun 20-də parlament yeni hökumətin tərkibini təsdiqləyib və onun proqramına xeyir-dua verib. Səsverməyə qatılan 105 deputatdan 99-u hökumətə dəstək nümayiş etdirib, 6 nəfər tərkibin və proqramın əleyhinə çıxıb.
Mamuka Baxtadzenin hökumətində üç yeni nazir var: xarici işlər naziri vəzifəsinə David Zalkaliani, maliyyə naziri postuna Nikoloz Qaqua, iqtisadiyyat və davamlı inkişaf naziri vəzifəsinə Georgi Çerkezişvili gətirilib. Qalan nazirlər əvvəlki hökumətin tərkibində də yer alırdı.
Gürcüstanda hökuməti 150 yerlik parlamentə azı 76 mandat əldə edən partiya formalaşdırır. 2016-cı ilin oktyabrında keçirilmiş son parlament seçkisində Gürcü Arzusu – Demokratik Gürcüstan Partiyası 115 mandat qazanaraq konstitusion çoxluq əldə edib. 2012-ci ildə qurulmuş partiya həmin ilin oktyabr ayından hakimiyyətdədir.
İyunun 13-də Gürcüstan hökuməti tam tərkibdə istefaya gedib. Bu, Georgi Kvirikaşvilinin həmin gün baş nazir postundan ayrılmasının nəticəsi olub. Georgi Kvirikaşvili istefasının Gürcü Arzusu – Demokratik Gürcüstan Partiyasının sədri Bidzina İvanişvili ilə fikir ayrılığından doğduğunu deyib. Bunun ardınca yeni hökuməti formalaşdırmaq Mamuka Baxtadzeyə həvalə olunub.
1982-ci il təvəllüdlü Mamuka Baxtadze Tbilisi Dövlət Universitetinin, Gürcüstan Texniki Universitetinin, Moskva Dövlət Universitetinin və Fransa Biznes Məktəbinin məzunudur. 2017-ci ilin noyabr ayından maliyyə naziri postunu tutub.
