Qələbə və məğlubiyyət ssenariləri
UEFA Avropa Liqasına vəsiqə almış Azərbaycan klublarının potensial rəqibləri də bəllidir. Novator.az bildirir ki, təmsilçilər Avropa Liqasına 1-ci mərhələdən qoşulur. 12-19 iyulda keçiriləcək həmin raundda “Keşlə“ Maltanın “Balzan” komandası ilə üz-üzə gəlir. Mərhələ adlayacağı halda “Keşlə“ 2-ci raundda (26 iyul-2 avqust) “Milsami” (Moldova) – “Slovan” (Slovakiya) cütlüyünün qalibinin qarşısına çıxacaq.
“Qəbələ” ilk sınaqda Lüksemburqun “Proqres” komandasını məğlub etsə, növbəti mərhələdə “Honved” (Macarıstan) – “Rabotniçki” (Makedoniya) cütlüyünün üstün komandası ilə görüşəcək.
“Neftçi”nin ilk rəqibi Macarıstanın “Uypeşt” komandasıdır. Onu ələyəcəyi halda “Neftçi”ni 2-ci mərhələdə İspaniyanın “Sevilya” komandası gözləyir.
Çempionlar Liqasındakı təmsilçi “Qarabağ”a püşk 1-ci mərhələdə (10-18 iyul) Sloveniyanın “Olimpiya” komandasını qismət edib. 24 iyul-1 avqust arası keçiriləcək 2-ci raunda çıxacağı halda Ağdam klubu “Kukesi” (Albaniya) – “Valletta” (Malta) cütlüyünün qalibi ilə görüşəcək. “Olimpiya” səddini keçə bilməsə, “Qarabağ” Avropa Liqasına ələnərək 2-ci raundda “Ludoqorets” (Bolqarıstan) – “Kruzeyders” (Şimali İrlandiya) cütlüyünün məğlubu ilə oynayacaq.
