Nazirin istefası qəbul olunmadı
Ermənistanın baş naziri Nikol Paşinyan əmək və sosial məsələlər naziri Mane Tandilyanın istefasını qəbul etməyib.
1978-ci il təvəllüdlü Mane Tandilyan nazir postunu mayın 12-dən tutur. O, iyunun 12-də istefa verdiyini açıqlamış, bunu pensiya qanunvericiliyində yeniliyə etirazı ilə bağlamışdı.
İyulun 1-dən pensiya təyinatında icbari yığım sistemi tam qüvvəyə minir. Mane Tandilyan bu sistemin tətbiqini bir il müddətinə təxirə salmağı təklif edib, amma hökumət onun istəyini nəzərə almayıb.
Novator.az-ın məlumatına görə, iyunun 21-i hökumətin iclasında danışan baş nazir Nikol Paşinyan Mane Tandilyanın nazir postunda qalacağını deyib. O qeyd edib ki, nazirlə pensiya sisteminin təkmilləşdirilməsi istiqamətində müzakirələr aparıb: “Mane Tandilyan iqtisadi inkişaf və investisiyalar, ədliyyə nazirləri ilə birlikdə yeni qanun layihəsi hazırlayacaq. Bunun üçün 2 ay müddət təyin olunub”.
Mane Tandilyan baş nazirə təşəkkür edərək deyib ki, pensiyaların yığım hissəsi ilə bağlı yeni qanun tezliklə hazırlanacaq və onun 2019-cu il yanvarın 1-dən tətbiqi yaxşı olar.
Vətəndaş Sazişi Partiyasının sədri olan Nikol Paşinyan baş nazir postuna mayın 8-də gətirilib. Mane Tandilyan hökumətə Vətəndaş Sazişi Partiyasının müttəfiqi olan İşıqlı Ermənistan Partiyasının nümayəndəsi kimi daxil edilib. O, İşıqlı Ermənistan Partiyasında sədrin müavinidir.
