Belə qabda su da təhlükəlidir…
Rusiyalı həkimlər polietilen və plastik qablarda satılan süd məhsullarının sağlamlığa ziyanını araşdırıb. Novator.az-ın məlumatına görə, tədqiqat göstərib ki, məhsulların belə qablaşdırılması mədə-bağırsaq pozuntusu riskini artırır. Polietilen və plastik qablardan qaraciyəri zəhərləyən maddə – ftalat yayıldığı açıqlanıb.
Ftalat möhkəmliyi artırmaq məqsədilə plastmasın tərkibinə qatılan maddədir.
Alimlər polietilen və plastik qablardakı məhsullardan 25 nümunə götürərək laboratoriya şəraitində müayinə ediblər. Plastik butulkalardan götürülən nümunələrin 40%-də, polietilen paketlərdəki nümunələrin 58%-də ftalat maddəsi aşkarlanıb. Həkimlər qeyd edirlər ki, süd məhsulları qəbul edənlərin orqanizminə gün ərzində xeyli miqdarda ftalat maddəsi daxil ola bilər.
Mütəxəssislər belə qablarda adi suyun da təhlükəli olduğunu qeyd edirlər. Onlar hesab edir ki, plastik və polietilen qabdakı istənilən maye orqanizm üçün təhlükə yaradır.
Ekspertlər sintetik parçaların, tikinti materialları və uşaq oyuncaqlarının tərkibində də ftalat maddəsinin olduğunu vurğulayırlar.
Səidə Hüseynova
