Parisdə Bakı təqdimatı
İyunun 13-ü Parisdə, Beynəlxalq Sərgilər Bürosunun Baş Assambleyasının 163-cü sessiyasında “Ekspo 2025” Ümumdünya Sərgisinə ev sahibliyinə namizədlik təqdimatları keçirilib. AZƏRTAC xəbər verir ki, sessiyada baş nazir Novruz Məmmədov və nümayəndə heyəti üzvləri Bakı şəhərini təqdim ediblər.
Novruz Məmmədov çıxışında Azərbaycan hökuməti və cəmiyyətinin Bakının namizədliyini tam dəstəklədiyini vurğulayıb. Bakının “Ekspo 2025”ə ev sahibliyi etməyə tam hazır olduğunu bildirən baş nazir əlavə edib ki, Azərbaycan qitələrin və sivilizasiyaların kəsişməsində yerləşir: “Ölkəmiz əsrlər boyu Qərb və Şərq, Şimal və Cənub arasında siyasət, iqtisadiyyat və ticarət körpüsü olub. İki min il ərzində İpək Yolu müasir Azərbaycan torpaqlarından keçib və keçir. Ümumdünya sərgisini keçirməklə ölkəmiz mədəniyyətlərarası dialoqa, tolerantlığa daha böyük töhfə verə bilər. Əsrlər boyunca Azərbaycanda müxtəlif etnik qruplar və dinlər sülh və qarşılıqlı hörmət mühitində birgə yaşayıblar. Cəmiyyətimiz, dövlətimiz dünyəvidir və biz bundan qürur duyuruq”.
Təqdimat zamanı Azərbaycan haqqında və Bakının “Ekspo 2025” Ümumdünya Sərgisinə namizəd şəhər olması barədə filmlər nümayiş etdirilib.
Novruz Məmmədov AZƏRTAC-a müsahibəsində deyib ki, Azərbaycan gənc müstəqil dövlət olsa da, müstəqillik illərində çox böyük beynəlxalq tədbirlərə uğurla ev sahibliyi edib: “Bizim bu sahədə zəngin təcrübəmiz var. Bu il noyabrın 22-si və 23-də səsvermə mərhələsi keçiriləcək. İnanıram ki, səsvermə Azərbaycan üçün uğurlu olacaq. Ümumiyyətlə, belə bir mühüm tədbirdə Azərbaycanın iştirakının özü böyük hadisədir. Ancaq tam uğurumuz üçün hələ çox çalışmalıyıq”.
