İqtisadi artım: hər adama neçə manat düşür?
2018-ci ilin yanvar-may aylarında Azərbaycanın ümumi daxili məhsulu (ÜDM) ötən ilin ilk beş ayına nisbətən 1,1 faiz artaraq 29 milyard 294 milyon manata çatıb. Əhalinin hər nəfərinə 2991,1 manat ÜDM düşüb. Novator.az bildirir ki, Dövlət Statistika Komitəsi belə hesabat yayıb.
Rəsmi məlumata görə, ÜDM-in 48,8 faizi sənayedə, 9,9 faizi ticarət; nəqliyyat vasitələrinin təmiri sahələrində, 6,7 faizi tikintidə, 6,1 faizi nəqliyyat və anbar təsərrüfatı, 3,5 faizi kənd təsərrüfatı, meşə təsərrüfatı və balıqçılıq, 2,6 faizi turistlərin yerləşdirilməsi və ictimai iaşə, 1,6 faizi informasiya və rabitə sahələrində, 13,8 faizi digər sahələrdə istehsal olunub, məhsula və idxala xalis vergilər isə ÜDM-in 7 faizini təşkil edib.
Əvvəlki ilin müvafiq dövrünə nisbətən iqtisadiyyatın qeyri-neft sektorunda əlavə dəyər istehsalı 1,9 faiz artıb.
Novator.az xatırladır ki, 2017-ci ildə 70,1 milyard manatlıq, əvvəlki illə müqayisədə 0,1 faiz çox ümumi daxili məhsul istehsal edilmişdi.
2016-cı ildə Azərbaycanda ÜDM istehsalı 2015-ci ilə nisbətən 3,8% düşmüşdü. Bu, 1995-ci ildən bəri ilk azalma olmuşdu.
