Paşinyanın naziri niyə istefa verir?
Ermənistanın əmək və sosial məsələlər naziri Mane Tandilyan iyunun 12-də istefa verib. 1978-ci il təvəllüdlü Mane Tandilyan nazir postunu mayın 12-dən tuturdu.
Novator.az-ın məlumatına görə, Mane Tandilyan istefasını pensiya qanunvericiliyində yeniliyə etirazı ilə bağlayıb. İyulun 1-dən pensiya təyinatında icbari yığım sistemi tam qüvvəyə minir. Mane Tandilyan bu sistemin tətbiqini bir il müddətinə təxirə salmağı, ictimai müzakirələr aparmağı təklif edib, amma hökumət onun istəyini nəzərə almayıb.
Ermənistan hökumətinə mayın 8-dən Vətəndaş Sazişi Partiyasının 43 yaşlı sədri Nikol Paşinyan baş nazirlik edir. Mane Tandilyan hökumətə Vətəndaş Sazişi Partiyasının müttəfiqi olan İşıqlı Ermənistan Partiyasının nümayəndəsi kimi daxil olmuşdu. O, İşıqlı Ermənistan Partiyasında sədrin müavinidir.
12 iyun bəyanatında Mane Tandilyan partiyadan ayrıldığını da bildirib.
