Kaliforniya ştatını bölmək təklifi referenduma çıxarılır
ABŞ-ın Kaliforniya ştatı üç yerə bölünə bilər. Novator.az-ın məlumatına görə, bu təşəbbüs noyabrın 6-sı ştatda referenduma çıxarılacaq. Ştatın katibi Aleks Padilla belə bəyanat verib. O, referendumla bağlı yekun qərarın iyunun 28-də veriləcəyini vurğulayıb.
Kaliforniyanın üç ştata bölünməsi riskli layihələr üzrə yerli sərmayəçi Tim Dreyperin təşəbbüsüdür. Üç ştat təşəbbüsü 600 min imza toplaya bilib. Təklifin referenduma çıxarılması üçün 365 min 880 imza yetərli idi.
Tim Dreyperin layihəsi mərkəzi, cənub və şimal ştatlarının yaradılmasını nəzərdə tutur. Ştatlara sakinlərin ad verəcəyi ehtimal olunur. Ancaq yeni ştatların yaranması üçün Konqresin razılığı gərəkdir.
18-ci əsrin sonlarında yaradılan ABŞ hazırda 50 ştatdan və bir dairədən ibarətdir.
Səidə Hüseynova
