Ermənistan prezidenti Qarabağdadır
Ermənistan prezidenti Armen Sərkisyan iyunun 13-də Azərbaycanın işğal olunmuş ərazisinə səfər edib. Novator.az bildirir ki, Armen Sərkisyanın Dağlıq Qarabağa işğalçı rejimin başçısı Bako Saakyanın dəvəti ilə yollandığı açıqlanıb.
1953-cü il təvəllüdlü Armen Sərkisyan bu il martın 2-si parlamentdə prezident seçilib. O, aprelin 9-da and içərək səlahiyyətlərinin icrasına başlayıb. Dövlət başçısı funksiyası daşıyan prezidentin səlahiyyət müddəti 7 ildir.
1988-ci ilin fevral ayında ermənilər Azərbaycanın Dağlıq Qarabağ Muxtar Vilayətinin Ermənistanın tərkibinə verilməsi tələbi ilə separatçı hərəkata başlayıb. Bu hərəkat getdikcə vüsət alaraq Ermənistanın Azərbaycana açıq hərbi təcavüzünə çevrilib.
1991-ci il sentyabrın 2-də ermənilər Dağlıq Qarabağı “müstəqil dövlət” elan edib. Bunun ardınca işğalçı müharibə alovlanıb. 1994-cü ilin may ayında elan olunan atəşkəsə qədər Ermənistan Dağlıq Qarabağı və onun ətrafındakı 7 rayonu işğal edib.
