“Xəzər”i necə almaq olar?
Neftçala Sənaye Məhəlləsindəki “Xəzər” avtomobil zavodunda istehsal olunan avtomobillər satışa çıxarılır.
Azərbaycanla İranın birgə inşa etdiyi zavod bu il martın 29-da açılıb. İqtisadiyyat Nazirliyi bildirir ki, zavodda istehsal olunan avtomobillər Avro-5 və beynəlxalq təhlükəsizlik standartlarına tam uyğundur, “Made in Azerbaijan” brendi altında təqdim olunacaq.
Zavodun illik istehsal gücü 10 min avtomobildir. Bu ilin sonunadək zavodda hər ay orta hesabla 60 ədəd “Xəzər” LD və 100 ədəd “Xəzər” SD modelli avtomobillər istehsal olunacaq. 2018-ci ilin sonunadək 1500, 2019-cu ildə 3000, 2020-ci ildə 5000 ədəd avtomobilin istehsalı planlaşdırılır.
Avtomobillər ilkin olaraq Bakı şəhərinin Badamdar qəsəbəsində yerləşən Avtomobil Satış Mərkəzində satışa çıxarılacaq. Bir müddət sonra paytaxtın digər yerlərində, eləcə də regionlarda satış mərkəzlərinin açılması nəzərdə tutulur.
“Xəzər” SD avtomobillərinin qiyməti 16 min manat, “Xəzər” LD avtomobillərinin qiyməti 18 min manatdır. Avtomobilləri nağd, köçürmə və 20% ilkin ödəniş etməklə 4 il müddətinə lizinq yolu ilə əldə etmək olar.
