Daha bir REAL-çı həbs cəzası alıb
REAL Partiyanın üzvü Anar Məmmədov həbs edilib. Məlumatı “Amerikanın səsi” REAL-ın Məclis üzvü Natiq Cəfərliyə istinadla yayıb.
Məlumatda deyilir ki, Anar Məmmədova 10 sutka inzibati həbs cəzası verilib. Qərar Yasamal Rayon Məhkəməsində çıxarılıb.
Anar Məmmədov polisin qanuni tələbinə tabe olmamaqda təqsirli bilinib.
Hazırda eyni ittihamla REAL Partiyanın Məclis üzvləri Azər Qasımlı və Elmin Həmzə, partiya fəalları Nəriman Mücahid İsmayıl və Ərəstun Baxşəliyev də həbsdədirlər.
Azər Qasımlıya 30, Elmin Mirzəyə 25, Nəriman Mücahid İsmayıla 30, Ərəstun Baxşəliyevə 30 sutka həbs verilib. Azər Qasımlı barəsində qərar mayın 29-da, Elmin Mirzə, Nəriman Mücahid İsmayıl və Ərəstun Baxşəliyev barəsində qərarlar mayın 30-da çıxarılıb.
REAL Partiyanın fəalları rəsmi ittihamları qəbul etmirlər. Onların fikrincə, bu həbslərin hamısı mayın 28-də paytaxtda keçirilmiş yürüşə görədir.
Mayın 28-də REAL Partiyanın fəalları Respublika Günü münasibətilə paytaxtın mərkəzində yürüş keçiriblər. Polis aksiyanın şəhər rəhbərliyi ilə razılaşdırılmadığını bildirərək yürüşün sonadək davam etməsinə imkan verməyib.
Respublikaçı Alternativ Partiyası eyni adlı ictimai-siyasi hərəkatın bazasında 2018-ci ilin aprelində təsis olunub. Təsis qurultayında partiyanın sədri vəzifəsinə həbsdə olan İlqar Məmmədov seçilib.
İlqar Məmmədov yarandığı vaxtdan – 2008-ci ildən REAL Hərəkatına rəhbərlik edib. O, 2013-cü il fevralın 4-də, İsmayıllıda hökumət əleyhinə iğtişaşlar (23-24 yanvar 2013-cü il) təşkil etmək ittihamı ilə tutulub, 7 il azadlıqdan məhrumetmə cəzası alıb.
