Dağılan körpüyə 3,5 milyon manat ayrılıb
Bakı-Şamaxı-Yevlax magistral avtomobil yolunun 217-ci kilometrində Ağsu və Göyçay rayonlarını birləşdirən körpünün bərpası üçün vəsait ayrılıb. Dövlət başçısı İlham Əliyevin imzaladığı sərəncamla 2018-ci ilin büdcəsindən, prezidentin ehtiyat fondundan Azərbaycan Avtomobil Yolları Dövlət Agentliyinə 3,5 milyon manat köçürüləcək.
Göyçay çayı üzərindəki avtomobil körpüsünü iyunun 2-də sel dağıdıb.
APA-nın xəbərinə görə, Baş Prokuror yanında Korrupsiyaya Qarşı Mübarizə Baş İdarəsində bu iş üzrə cinayət işi qaldırılıb. İki nəfərə Cinayət Məcəlləsinin 308.2-ci (vəzifə səlahiyyətlərindən sui-istifadə etmə), 192.2.1-ci (külli miqdarda ziyan vurmaqla sahibkarlıqla məşğul olma), 255-ci (yerin təkinin qorunması və istifadəsi qaydalarını pozma) maddələri ilə ittiham elan edilib.
Bəlli olub ki, müqavilələri ləğv edilmiş bəzi karxanalar gizli yolla çay məcrasından material götürüb, o cümlədən Bakı-Şamaxı-Yevlax avtomobil yolunun 217-ci kilometrində çayın üzərində yerləşən körpü keçidinin dayaq və bünövrə konstruksiyalarına ziyan vurublar.
