Ərdoğan ilk turda seçilə bilmir?
Türkiyənin hakim Ədalət və İnkişaf Partiyasının sədri, dövlət başçısı Rəcəb Teyyub Ərdoğan qarşıdan gələn prezident seçkisinin ilk turunda qalib gəlməyə bilər. İyunun 7-də ölkənin SONAR sosioloji mərkəzi bu ayın 24-nə təyin olunmuş prezident seçkisi (həmin gün parlament seçkisi də keçiriləcək) ilə bağlı rəy sorğusunun nəticələrini açıqlayıb. Novator.az-ın məlumatına görə, sorğunun mayın 29-dan iyunun 3-dək 26 vilayətdə, 3 min nəfər arasında keçirildiyi bəyan olunub.
Rəcəb Teyyub Ərdoğan rəy sorğusunda 48,3%-lə öndə göstərilir.
Cümhuriyyət Xalq Partiyasının namizədi, Böyük Millət Məclisinin deputatı Məhərrəm İncə 31,4%, Yaxşı Partiyanın lideri Maral Akşener 9,5%, Xalqların Demokratik Partiyasından Səlahəddin Dəmirtaş (hazırda həbsdədir) 8,2% nəticə göstərib.
Prezident seçkisində Səadət Partiyasının lideri Təməl Qaramollaoğlu və Vətən Partiyasının lideri Doğu Perinçek də iştirak edir.
1954-cü ildə İstanbulda doğulan Rəcəb Teyyub Ərdoğan siyasətlə 1976-cı ildən məşğuldur. Milli Salamat, Rifah, Fəzilət partiyalarının üzvü olub. 1994-1998-ci illərdə İstanbul bələdiyyəsinin başçısı postunu tutub. 1999-cu ildə həbsdə yatıb.
2001-ci ildə Ədalət və İnkişaf Partiyasını yaradıb. Bu partiya 2002-ci ildən təkbaşına hakimiyyətdədir.
Rəcəb Teyyub Ərdoğan 2003-cü ildən 2014-cü ilədək baş nazir olub. 2014-cü ildən prezidentdir.
Türkiyənin seçimi: rəy sorğusu nə göstərir?
Türkiyə: yeni rəy sorğusunun nəticələri
