Fərman: Mədəniyyət Nazirliyinin statusu rəsmiləşdi
Prezident İlham Əliyev Mədəniyyət Nazirliyinin fəaliyyətini təmin etməyə fərman verib. Fərman Mədəniyyət Nazirliyi haqqında əsasnamənin, nazirliyin strukturunun və Mədəni İrsin Qorunması, İnkişafı və Bərpası üzrə Dövlət Xidməti haqqında əsasnamənin təsdiqini nəzərdə tutur.
Novator.az xatırladır ki, bu il aprelin 20-də Mədəniyyət və Turizm Nazirliyinin əsasında iki yeni qurum – Mədəniyyət Nazirliyi və Dövlət Turizm Agentliyi yaradılıb.
İyunun 6-da imzalanmış prezident fərmanına əsasən, Mədəniyyət Nazirliyinin işçilərinin say həddi 384 ştat vahidi olur. Nazirliyin aparatında 140, Mədəni İrsin Qorunması, İnkişafı və Bərpası üzrə Dövlət Xidmətində 25, Bakı Şəhər Mədəniyyət Baş İdarəsi və regional mədəniyyət idarələrində 219 nəfər çalışa bilər.
Mədəniyyət Nazirliyi mədəniyyət, incəsənət, tarix və mədəniyyət abidələrinin qorunması, nəşriyyat və kinematoqrafiya sahələrində dövlət siyasətini və tənzimləməsini həyata keçirən mərkəzi icra hakimiyyəti orqanıdır.
Nazirliyin fəaliyyətinə mədəniyyət naziri rəhbərlik edir. Onun birinci müavini və iki müavini var. Naziri və müavinlərini ölkə prezidenti vəzifəyə təyin edir.
