Azərbaycanda siyasi məhbus məsələsi üzrə məruzəçi təyin olunacaq
Avropa Şurası Parlament Assambleyası (AŞPA) Azərbaycanda siyasi məhbus məsələsi ilə bağlı məruzəçi təyin edəcək.
“Amerikanın səsi”nin məlumatına görə, bununla bağlı Avropa Şurasının yaydığı açıqlamada deyilir ki, AŞPA Bürosunun iclasında siyasi məhbus məsələsi üzrə Azərbaycana məruzəçi təyin edilməsi təklifi müzakirə olunub və büro məruzəçinin təyin edilməsinə qərar verib.
Məruzəçinin AŞPA-nın yay sessiyasında təyin olunacağı gözlənir.
Azərbaycanda siyasi məhbus məsələsi üzrə məruzəçi təyin olunması və ölkədəki siyasi məhbuslarla bağlı hesabatın hazırlanması təklifini 2 ay əvvəl AŞPA-nın 24 deputatı irəli sürüb.
Azərbaycanın bəzi hüquq müdafiəçiləri bəyan edirlər ki, Azərbaycanda 150 nəfərdən çox siyasi məhbus var. Ancaq Azərbaycan hakimiyyəti ölkədə siyasi məhbus olması haqda iddiaları rədd edir. Hakimiyyət rəsmiləri deyirlər ki, siyasi məhbus sayılan şəxslər törətdikləri konkret cinayət əməllərinə görə məsuliyyətə cəlb ediliblər.
Avropa Şurası 2012-ci ildə siyasi məhbus anlayışının meyarlarını müəyyənləşdirib. Meyarlara görə, azadlıqdan məhrum edilən şəxsə bu hallarda siyasi məhbus kimi baxılmalıdır: saxlanma fikir, vicdan və din azadlığı, fikrin ifadə olunması və informasiya azadlığı, toplaşma və birləşmə azadlığı pozulmaqla həyata keçirilibsə; saxlanma istənilən cinayətlə əlaqəsi olmadan siyasi səbəblərdən həyata keçirilibsə; həbsdə saxlamanın müddəti və ya onun şərtləri şəxsin ittiham olunduğu cinayətə proporsional deyilsə; vətəndaş digər şəxslərlə müqayisədə ayrı-seçkilik əsasında saxlanıbsa və ya saxlama ədalətsiz məhkəmə çəkişməsinin nəticəsidirsə və bu, hakimiyyətin siyasi motivləri ilə bağlıdırsa.
