Vaşinqton merindən Azərbaycan bəyannaməsi
ABŞ-ın paytaxtı Vaşinqtonun meri Myuriel Bouzer Azərbaycan Xalq Cümhuriyyətinin yaranmasının 100 illiyi ilə əlaqədar bəyannamə imzalayıb.
AZƏRTAC xəbər verir ki, bəyannamədə 1918-ci il mayın 28-də müsəlman Şərqində ilk dünyəvi parlament respublikası olan Azərbaycan Xalq Cümhuriyyətinin qurulduğu və dünyanın digər demokratik dövlətlərinin, o cümlədən ABŞ-ın həmin respublikanı tanıdığı qeyd olunur.
Bildirilir ki, yenidən azadlığını qazanan Azərbaycan suverenliyini və müstəqilliyini möhkəmləndirib, hazırda regionda ABŞ-ın müttəfiqi və strateji tərəfdaşıdır.
Bəyannamədə Azərbaycanın ABŞ-dakı səfirliyinin Vaşinqton şəhəri ilə tərəfdaşlıq etdiyi, şəhərdə təhsil və mədəniyyətin müxtəlifliyinə töhfələr verdiyi vurğulanır.
Mer Bouzer dünyada yaşayan milyonlarla və ABŞ-da yaşayan on minlərlə azərbaycanlının Azərbaycan Xalq Cümhuriyyətinin yarandığı 28 Mayı Respublika Günü olaraq qeyd etdiyini və Vaşinqton şəhərində Azərbaycan Milli Günü elan etdiyini bildirir.
Azərbaycan Xalq Cümhuriyyəti 1920-ci il aprelin 28-dəki bolşevik işğalınadək yaşayıb.
1991-ci ildə dövlət müstəqilliyinin bərpası üç mərhələdən keçib: avqustun 30-da parlament Azərbaycan Respublikasının dövlət müstəqilliyinin bərpa olunması haqqında bəyannamə, oktyabrın 18-də dövlət müstəqilliyi haqda konstitusiya aktı qəbul edib, dekabrın 29-da akt ümumxalq səsverməsi ilə təsdiqlənib.
