İlham Əliyev hərbi şəhərciyə baş çəkib
Prezident, Silahlı Qüvvələrin ali baş komandanı İlham Əliyev iyunun 5-də Müdafiə Nazirliyinin “N” saylı hərbi hissəsi üçün inşa edilmiş hərbi şəhərcikdə yaradılan şəraitlə tanış olub.
AZƏRTAC xəbər verir ki, hərbi şəhərcikdə 28 yaşayış və qeyri-yaşayış binası, 350 avtomobil və zirehli texnikanın saxlanması üçün park inşa edilib. Ərazidə qərargah binası tikilib, binadakı 28 xidməti otaqda hərbi qulluqçular üçün zəruri şərait yaradılıb.
Hərbi şəhərcikdə 120 nəfərlik 8 və 150 nəfərlik 1 əsgər yataqxanası tikilib. Subaylar üçün 126 nəfərlik 3 yataqxana, zabitlər üçün 14 mənzilli 2 yaşayış binası inşa olunub. Əsgər yeməkxanası 1500 hərbi qulluqçu üçün nəzərdə tutulub. Hərbi şəhərcikdə çörəkbişirmə məntəqəsi də fəaliyyət göstərir.
Ərazidə inşa olunan trenajor binasında atış və sürücülük məşqlərinin keçirilməsi üçün 4 tank və 6 piyada döyüş maşını təlim-məşq qurğusu quraşdırılıb.
Hərbi şəhərcikdə 500 yerlik klub binası da var.
Şəhərcikdə hamam-camaşırxana-qazanxana kompleksi də var.
Ərazidə tibb məntəqəsi tikilib. Məntəqə 56 çarpayılıqdır.
Şəhərcikdə qarovulxana binası inşa olunub, ərzaq və əşya anbarları, transformator yarımstansiyası, nəzarət-buraxılış məntəqəsi, su nasos stansiyası, 500 kubmetrlik 2 su anbarı quraşdırılıb.
