“Exo”nun səsini kimlər eşidib?
Novator.az mayın 26-dan fəaliyyətini dayandıran rusdilli “Exo” qəzetinin baş redaktorunun birinci müavini Ruslan Manafovla əlaqə saxlayıb.
2001-ci ildən çıxan “Exo” qurucu baş redaktor Rauf Talışinskinin vəfatından sonra maliyyə çatışmazlığı ucbatından qapanıb. Rauf Talışinski mayın 8-də qəflətən vəfat edib.
İctimai-siyasi nəşr olan “Exo” qəzeti həftədə 5 dəfə (çərşənbə axşamı, çərşənbə, cümə axşamı və cümə günləri 6 min tirajla, şənbə günləri 10 minə yaxın tirajla) çıxırdı.
İyunun 5-də Novator.az-a danışan Ruslan Manafov bildirib ki, qəzet qapanandan sonra “Exo”nun əməkdaşlarının bir qismi digər media orqanlarında iş tapıb, başqa əməkdaşlara da müxtəlif dəvətlər gəlib.
Ruslan Manafov qəzetin fəaliyyəti dayandıqdan sonra hakimiyyət qurumlarından, Mətbuat Şurasından və Kütləvi İnformasiya Vasitələrinin İnkişafına Dövlət Dəstəyi Fondundan nəşrin bərpası üçün hər hansı təklifin gəlmədiyini bildirib. O qeyd edib ki, yalnız bir çox ziyalı ona və digər əməkdaşlara müraciət edərək qəzetin fəaliyyətinin bərpasına kömək məqsədilə rəsmi qurumlara üz tutmağa, imza toplamağa hazır olduqlarını deyiblər.
Səidə Hüseynova
