İtaliyada yeni hökumətə yaşıl işıq
İtaliyada sağ mərkəzçi Şimal Liqasının və radikal “5 ulduz” hərəkatının hökumət qurmasına yaşıl işıq yandırılıb.
Novator.az xatırladır ki, prezident Serco Mattarella mayın 23-də Şimal Liqası və “5 ulduz” hərəkatının baş nazir postuna ortaq namizədi Cüzeppe Konteyə hökumət qurmağı tapşırmışdı. 54 yaşlı hüquqçu Cüzeppe Kontenin iqtisadiyyat və maliyyə naziri postuna namizəd göstərdiyi Paolo Savona Serco Mattarellanı narazı salmış və proses dayanmış, Serco Mattarella hökumət qurmağı iqtisadçı Karlo Kottarelliyə həvalə etmişdi.
Mayın 31-də Şimal Liqası və “5 ulduz” hərəkatı iqtisadiyyat və maliyyə naziri postuna başqa namizəd göstərməyə razılaşdığı üçün Cüzeppe Konte yenidən hökumət qurmaq mandatı əldə edib.
Bu il martın 4-də parlamentin aşağı və yuxarı palatalarına keçirilmiş seçkidə sağ mərkəzçi koalisiya birinci, “5 ulduz” hərəkatı ikinci yeri tutub. O vaxtdan bəri yeni hökumət qurulmayıb.
