Dövlət agentliyi necə investisiya qoya bilər?
Prezident İlham Əliyev fərman imzalayaraq İcbari Tibbi Sığorta üzrə Dövlət Agentliyinin investisiya əməliyyatları aparması qaydasını təsdiq edib. Ümumi müddəalarda qeyd olunur ki, qaydanın məqsədi icbari tibbi sığortanın maliyyə dayanıqlığının təmin edilməsi, agentliyin vəsaitinin itirilməsi riskinin minimuma endirilməsi, həmin vəsaitin nominal və real dəyərinin qorunub saxlanması, gəlir əldə edilməsinə imkan verən siyasətin həyata keçirilməsidir.
Novator.az-ın məlumatına görə, sənəddə investisiya əməliyyatlarının həyata keçirilməsinin prinsipləri belə sıralanır: təhlükəsizlik, likvidlik, şəffaflıq, gəlirlilik, müxtəliflik.
Sərbəst maliyyə vəsaitinin idarə edilməsi barədə qərarı İdarə Heyəti həmin vəsaitin proqnozlaşdırılan həcmini, likvidlik və gəlirlilik dərəcəsini nəzərə almaqla qəbul edir. İnvestisiya əməliyyatlarının aparılması zamanı sərbəst maliyyə vəsaitinin həcmi gələcək pul axınları (mədaxil və məxaric daxil olmaqla) nəzərə alınmaqla müəyyənləşdirilir.
Agentliyin sərbəst maliyyə vəsaitinin idarə olunmasından əldə etdiyi gəlir onun hesablaşma hesabına köçürülür və investisiya gəliri kimi uçota alınır.
Maliyyə vəsaitinin banklarda depozitə qoyulması üçün bu tələblər yerinə yetirilməlidir: depozit müqaviləsinə əsasən gəlirlər aylıq və ya rüblük əsaslarla ödənilməlidir (bir ay müddətinə qoyulan depozitlərə münasibətdə gəlirlər depozit müddətinin bitdiyi gün ödənilməlidir); depozit müqaviləsinə əsasən depozitin (və ya onun hər hansı hissəsinin) vaxtından əvvəl geri götürülməsi hüququ təmin edilməlidir.
Bir banka qoyulan depozitin məbləği həmin bankın kapitalının 20 faizindən çox olmamalıdır. Depozit şəklində qoyulmuş investisiya agentliyin investisiya edilmiş sərbəst maliyyə vəsaitinin ümumi həcminin 50 faizini ötə bilməz.
Agentlik hər ilin yekunu üzrə aktivlərinin həcmi və investisiya əməliyyatları, o cümlədən həmin əməliyyatların nəticələri barədə martın 31-dək prezidentə hesabat təqdim edir.
