Balakişi Qasımov baş direktor seçildi
İyunun 1-də İctimai Televiziya və Radio Yayımları Şirkətinin Yayım Şurasının iclası keçirilib. Novator.az-ın məlumatına görə, iclasda şirkətin yeni baş direktoru seçilib.
9 nəfərlik Yayım Şurasının 8 üzvünün qatıldığı gizli səsvermədə Balakişi Qasımov qalib gələrək 4 il müddətinə baş direktor postunu tutmaq səlahiyyəti qazanıb. 8 nəfərin hamısı ona səs verib.
Digər namizədlər bunlar idi: Rauf Abbasov (Gəncə Regional Fövqəladə Hallar və Mülki Müdafiə Şöbəsinin rəis müavini), Səbuhi Abbasov (7news.az saytının baş redaktoru), Şəfəq Mehrəliyeva (ADA Universitetinin aparat rəhbəri), Rahilə Mehtiyeva (“Elit” informasiya agentliyinin baş direktoru), Qərənfil Xəlilova (hazırda işsizdir), Sadıq Qarayev (AMEA Mərkəzi Nəbatat Bağının elmi işçisi).
Mayın 11-də baş direktor Cəmil Quliyevin səlahiyyətlərinə vaxtından əvvəl xitam verilib. Rəsmi məlumata görə, Cəmil Quliyev səhhəti və gələcək yaradıcılıq planları ilə əlaqədar vəzifədən gedib. Balakişi Qasımov həmin gündən baş direktor vəzifəsini icra edirdi. O, 1978-ci ildə Bakıda doğulub. Azərbaycan Dövlət İqtisad Universitetini bitirib. “Kim? Harda? Nə vaxt?” klubunun oyunçusu, Azərbaycanda “Kim? Harda? Nə vaxt?” oyununun aparıcısı və baş prodüseri, Gametv.az Prodüser Mərkəzinin rəhbəri olub.
