Bakıda orta maaş 780 manata yaxınlaşıb
Bakı Şəhər Statistika İdarəsi paytaxtın sosial-iqtisadi göstəricilərini yayıb. Novator.az bildirir ki, hesabata görə, 2018-ci ilin yanvar-aprel aylarında sənayedə istehsalın və xidmətlərin həcmi 13 milyard manat təşkil edib. Sənaye məhsulunun 82,8 faizi mədən sektorunda istehsal olunub. Qeyri-dövlət sektorunun payı 83,7 faiz göstərilir.
Dörd ayda şəhərin iqtisadi və sosial sahələrinin inkişafı üçün əsas kapitala 3 milyard 679,5 milyon manat və ya əvvəlki ilin müvafiq dövrü ilə müqayisədə 15,8 faiz az vəsait yönəldilib. Sərmayənin 51,2 faizi dövlət, 48,8 faizi qeyri-dövlət sektorunun sərmayədarlarının payına düşüb.
Hesabata əsasən, yanvar-aprel aylarında ticarət dövriyyəsinin həcmi 2017-ci ilin müvafiq dövrü ilə müqayisədə 3,2 faiz, ictimai iaşə dövriyyəsi real ifadədə 4,1 faiz, əhaliyə göstərilən ödənişli xidmətlərin dəyəri 0,6 faiz artıb.
2018-ci ilin ilk rübündə işçilərin orta aylıq nominal əməkhaqqı 779,4 manata çatıb.
