Ölümə qarşı ölüm tamaşası
Öldürüldüyü bəyan olunmuş rusiyalı jurnalist Arkadi Babçenko… sağdır.
Qətl xəbəri mayın 29-da yayılmışdı. Məlumata görə, Arkadi Babçenko həmin gün axşam Ukraynanın paytaxtı Kiyevdə, yaşadığı binanın blokunda güllələnmiş, xəstəxanaya aparılarkən keçinmişdi.
Novator.az bildirir ki, mayın 30-u axşam qətl xəbərinin qurama olduğu açıqlanıb. Kiyevdə brifinq keçirən Ukrayna Təhlükəsizlik Xidmətinin rəisi Vasili Qrisak və baş prokuror Yuri Lusenko bəyan ediblər ki, Arkadi Babçenkonun öldürülməsi barədə yalan xəbər onun həyatını xilas əməliyyatının tərkib hissəsi olub. Rəsmilərin sözlərinə görə, Rusiyanın xüsusi xidmət orqanları Arkadi Babçenkonu öldürmək üçün bir nəfərə 30 min dollar boyun olub, amma Ukrayna Təhlükəsizlik Xidməti planın qarşısını alıb. Arkadi Babçenkonu öldürəcək şəxs tutulub. İki ay davam edən ifşa əməliyyatında Rusiyadan sifarişlə Ukraynada 30 nəfərin qətlinin planlaşdırıldığı üzə çıxıb.
Brifinqdə iştirak edən Arkadi Babçenko əməliyyata qoşulmasının zərurətdən irəli gəldiyini deyib, sarsıntı keçirmiş yaxınlarından üzr istəyib.
Arkadi Babçenko 1977-ci ildə Rusiya paytaxtında doğulub. Moskva Müasir Humanitar Universitetinin hüquq fakültəsini bitirib.
1995-1997-ci və 1999-2000-ci illərdə Rusiya Silahlı Qüvvələrinin tərkibində Çeçenistan müharibələrində iştirak edib.
2000-ci ildən jurnalistika ilə məşğul olan Arkadi Babçenko Rusiya hakimiyyətinin qatı tənqidçisi kimi ad çıxarıb, Ukraynaya təqiblər üzündən köçüb.
