Dördüncü həbs: Ərəstun Baxşəliyev də tutuldu
Mayın 30-da Respublikaçı Alternativ Partiyasının (REAL Partiya) üzvü Ərəstun Baxşəliyevə 30 sutka inzibati həbs cəzası verilib.
Azadliq.org-un məlumatına görə, qərar Yasamal Rayon Məhkəməsində çıxarılıb.
Ərəstun Baxşəliyev polisin qanuni tələbinə tabe olmamaqda təqsirli bilinib.
Eyni ittihamla REAL Partiyanın Məclis üzvləri Azər Qasımlı və Elmin Həmzə, partiya fəalı Nəriman Mücahid İsmayıl da həbs olunublar. Azər Qasımlıya 30, Elmin Mirzəyə 25, Nəriman Mücahid İsmayıla 30 sutka həbs verilib. Azər Qasımlı barəsində qərar mayın 29-da, Elmin Mirzə və Nəriman Mücahid İsmayıl barəsində qərarlar ayın 30-da çıxarılıb.
REAL Partiyanın fəalları rəsmi ittihamları qəbul etmirlər. Onların fikrincə, bu həbslər mayın 28-də paytaxtda keçirilmiş yürüşə görədir.
Mayın 28-də REAL Partiyanın fəalları Respublika Günü münasibətilə paytaxtın mərkəzində yürüş keçiriblər. Polis aksiyanın şəhər rəhbərliyi ilə razılaşdırılmadığını bildirərək yürüşün sonadək davam etməsinə imkan verməyib.
Respublikaçı Alternativ Partiyası eyni adlı ictimai-siyasi hərəkatın bazasında 2018-ci ilin aprelində təsis olunub. Təsis qurultayında partiyanın sədri vəzifəsinə həbsdə olan İlqar Məmmədov seçilib.
İlqar Məmmədov yarandığı vaxtdan – 2008-ci ildən REAL Hərəkatına rəhbərlik edib. O, 2013-cü il fevralın 4-də, İsmayıllıda hökumət əleyhinə iğtişaşlar (23-24 yanvar 2013-cü il) təşkil etmək ittihamı ilə tutulub, 7 il azadlıqdan məhrumetmə cəzası alıb.
