Baş nazirliyə namizəd dəyişdi
İtaliyada sağ mərkəzçi Şimal Liqasının və radikal “5 ulduz” hərəkatının baş nazir postuna ortaq namizədi, hüquqçu Cüzeppe Konte hökumət qurmaqdan imtina edib. Prezident Serco Mattarella ona mayın 23-də hökumət qurmağı tapşırmışdı. Cüzeppe Kontenin iqtisadiyyat və maliyyə naziri postuna namizəd göstərdiyi Paolo Savona Serco Mattarellanı narazı salıb. Paolo Savona Avropa İttifaqının vahid valyutası olan avroya sərt münasibəti ilə tanınır. Şimal Liqası və “5 ulduz” hərəkatı onu başqa şəxslə əvəzləmək istəmədiyi üçün Cüzeppe Konte hökumət qurmaq mandatını itirib.
Novator.az bildirir ki, Serco Mattarella hökumət qurmağı iqtisadçı Karlo Kottarelliyə həvalə edib. 1954-cü il təvəllüdlü Karlo Kottarelli hökumət qura bilməsə, növbədənkənar parlament seçkisinin qaçılmaz olacağı bildirilir.
Bu il martın 4-də parlamentin aşağı və yuxarı palatalarına keçirilmiş seçkidə sağ mərkəzçi koalisiya birinci, “5 ulduz” hərəkatı ikinci yeri tutub.
Hazırda İtaliya hökumətinə Demokrat Partiyasından Paolo Centiloni başçılıq edir. O, 2016-cı ilin dekabr ayında baş nazir təyin olunub.
