Müstəqillik illərində 11 amnistiya, 64 əfv verilib
1991-ci ildə müstəqilliyini bərpa edəndən bəri Azərbaycanda 11 amnistiya aktı, 64 əfv sərəncamı icra olunub. AZƏRTAC xəbər verir ki, bunu insan hüquqları üzrə müvəkkil (ombudsman) Elmira Süleymanova jurnalistlərə müsahibəsində deyib.
Elmira Süleymanova əlavə edib ki, mayın 24-də prezident İlham Əliyevin imzaladığı sərəncamla əfv edilmiş 634 nəfərdən 72-si onun vəsatəti ilə cəzadan azad olunub: “Ümid edirik ki, əfv olunan şəxslər öz səhvlərindən nəticə çıxaracaqlar”.
Azərbaycan Xalq Cümhuriyyətinin 100 illiyi münasibətilə imzalanan 24 may əfvi ilə həbsdə olan 607 nəfər, islah işləri cəzasına məhkum edilmiş 6 nəfər cəzasının çəkilməmiş hissəsindən, şərti həbsə məhkum edilmiş 9 nəfər və barəsində həbs qərarı çıxarılmış, amma cəzasını çəkməsi təxirə salınmış 1 nəfər cəzadan azad edilib. 11 nəfər isə cərimə cəzasından qurtulub.
