Baş Qərargahın rəisi dəyişdi
Ermənistan Silahlı Qüvvələri Baş Qərargahının rəisi dəyişib. Novator.az-ın məlumatına görə, mayın 24-ü axşam baş nazir Nikol Paşinyanın təqdimatını nəzərə alan prezident Armen Sərkisyan general-polkovnik Movses Akopyanı Baş Qərargahın rəisi postundan çıxarıb. Nikol Paşinyan həmin gün Movses Akopyanı baş hərbi müfəttiş vəzifəsinə təyin edib.
Baş Qərargahın rəisi postuna general-mayor Artak Davtyan gətirilib. O, korpus komandiri idi.
1965-ci ildə Azərbaycanın Dağlıq Qarabağ bölgəsində anadan olan Movses Akopyan 1988-ci ildən SSRİ Silahlı Qüvvələrinin Xankəndidəki 366-cı alayında, 1992-ci ildən Dağlıq Qarabağ separatçılarının ordusunda qulluq edib. Azərbaycan torpaqlarının işğalının və soyqırımı cinayətlərinin iştirakçısıdır. 2007-ci ildən işğalçı rejimin “müdafiə naziri” olub. 2015-ci ildən Ermənistan Silahlı Qüvvələri Baş Qərargahı rəisinin mavini, 20 may 2016-cı ildən müdafiə nazirinin müavini postunu tutub. 2016-cı il oktyabrın 3-dən Ermənistan Silahlı Qüvvələri Baş Qərargahının rəisi idi.
