Cərimə cəzalarında yeniliklər
İnzibati Xətalar Məcəlləsinin iki maddəsinə dəyişiklik prezident İlham Əliyevin imzası ilə qüvvəyə minib.
Novator.az bildirir ki, 282-ci maddə təbii qazın, elektrik və ya istilik enerjisinin talanması nəticəsində az miqdarda ziyan vurulmasına görə fiziki şəxslərin yüz manatdan yüz əlli manatadək məbləğdə, vəzifəli şəxslərin səkkiz yüz manatdan min manatadək məbləğdə, hüquqi şəxslərin iki min manatdan iki min beş yüz manatadək məbləğdə cəriməsini nəzərdə tutur.
İndiyədək “az miqdarda” dedikdə min manatadək olan məbləğ başa düşülürdü. Yeniliyə əsasən, “az miqdarda” dedikdə beş min manatdan yuxarı olmayan məbləğ başa düşüləcək.
447-ci maddədə dəyişikliyə görə, mal satan və ya əhaliyə xidmət göstərən şəxsin istehlakçını malın (xidmətin) ölçüsü, çəkisi, hesabı, habelə istehlak xüsusiyyəti və ya keyfiyyəti baxımından üç yüz manatdan yuxarı olmayan məbləğdə aldatması fiziki şəxslərə üç yüz əlli manatdan beş yüz manatadək məbləğdə, vəzifəli şəxslərə min beş yüz manatdan iki min manatadək məbləğdə, hüquqi şəxslərə dörd min manatdan altı min manatadək məbləğdə cərimə nəzərdə tutur.
İndiyədək yüz manatdan yuxarı olmayan məbləğdə aldatma məsuliyyətə səbəb olurdu.
