AXCP üzvü ev dustaqlığına buraxılıb
Mayın 22-si Nərimanov Rayon Məhkəməsində AXCP üzvü Mirfeyzulla Seyidovun ev dustaqlığına buraxılması barədə vəsatətə baxılıb.
Vəkil Cavad Cavadovun yaydığı məlumata görə, məhkəmə vəsatəti təmin edərək böyrək, diabet və hipertoniya xəstəliyindən əziyyət çəkən Mirfeyzulla Seyidov barəsindəki həbs qətimkan tədbirini dəyişib. Beləliklə, AXCP üzvü saxlandığı Bakı İstintaq Təcridxanasından evə buraxılıb.
Mayın 9-da tutulan Mirfeyzulla Seyidov barəsində 3 aylıq həbs qətimkan tədbirini mayın 10-da Nərimanov Rayon Məhkəməsi seçmişdi.
AXCP üzvü Cinayət Məcəlləsinin 234.4.3-cü (külli miqdarda qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma) maddəsi ilə ittiham olunur.
Cinayət Məcəlləsinin 234.4.3-cü maddəsində göstərilən əməllər 5 ildən 12 ilədək azadlıqdan məhrum etmə ilə cəzalandırılır.
Mirfeyzulla Seyidov irəli sürülən ittihamı qəbul etmir.
AXCP hesab edir ki, Mirfeyzulla Seyidov siyasi motivlərlə təqib olunur.
