Xarici işlər nazirinin yeni müavini
Xarici işlər nazirinin yeni müavini Ramiz Həsənov kollektivə təqdim olunub. Mayın 22-də Xarici İşlər Nazirliyində nazir müavinləri, kollegiya üzvləri, xüsusi tapşırıqlar üzrə səfirlər, idarə və struktur bölmələrin rəhbərlərinin iştirakı ilə iclas keçirilib. İclasa sədrlik edən nazir Elmar Məmmədyarov prezident İlham Əliyevin sərəncamı ilə nazir müavini təyin olunmuş Ramiz Həsənovu təqdim edib, ona uğurlar arzulayıb.
Novator.az bildirir ki, Ramiz Ayvaz oğlu Həsənov 1961-ci il avqustun 20-də Gürcüstanın Marneuli şəhərində anadan olub. 1982-ci ildə Moskva Dövlət Beynəlxalq Münasibətlər İnstitutunu bitirib.
1983-1990-cı illərdə SSRİ Xarici Ticarət Nazirliyində çalışıb.
1990-1992-ci illərdə Nazirlər Kabineti yanında Xarici İqtisadi Əlaqələr Komissiyasında, 1993-1997-ci illərdə Xarici İqtisadi Əlaqələr Nazirliyində işləyib.
1997-2004-cü illərdə “Azərkontrakt” Açıq Səhmdar Cəmiyyəti sədrinin birinci müavini olub.
2004-2005-ci illərdə Azərbaycanın Gürcüstandakı fövqəladə və səlahiyyətli səfiri postunu tutub.
2005-ci ildən Standartlaşdırma, Metrologiya və Patent üzrə Dövlət Agentliyinin baş direktoru, 2008-ci ildən Standartlaşdırma, Metrologiya və Patent üzrə Dövlət Komitəsinin sədri vəzifəsində çalışıb.
Bu ilin may ayından xarici işlər nazirinin müavinidir.
İngilis və rus dillərini bilir.
