İsraildəki “Avroviziya”ya hansı ölkələr maraq göstərir?
2019-cu ilin “Avroviziya” mahnı müsabiqəsi İsraildə keçirilməlidir. Bu, Portuqaliyanın paytaxtı Lissabonun ev sahibliyi etdiyi “Avroviziya 2018”də israilli müğənni Netta Barzilayın qələbəsi sayəsində mümkün olub. İctimai teleradioları cəmləşdirən Avropa Yayım Birliyinin 1956-cı ildən keçirdiyi “Avroviziya” yarışının qaydaları qalibə növbəti müsabiqəni təşkil etmək hüququ verir.
İsrail hökuməti “Avroviziya 2019”u Yerusəlimdə keçirmək niyyətindədir.
Novator.az bildirir ki, mayın 22-dək Almaniya, Bolqarıstan, Danimarka, Estoniya, Finlandiya, Fransa, İspaniya, İsveç, İsveçrə, Norveç, Polşa, San Marino, Serbiya, Ukrayna “Avroviziya 2019”da iştiraka ilkin maraq göstərdiklərini açıqlayıblar.
Yerusəlim (Qüds) işğal olunmuş şəhərdir. 1947-ci ildə BMT Fələstin torpaqlarının bölünməsinə qərar verib. Həmin qərara əsasən, ərazidə İsrail və Fələstin dövlətləri qurulmalı, Yerusəlim beynəlxalq nəzarətə verilməli idi. Ancaq 1948-ci ildə qurulan İsrail Yerusəlimi özünün paytaxtı sayır, şəhəri, o cümlədən BMT-nin Fələstinə ayırdığı bir çox başqa ərazini işğal edib.
