“Exo”nun son sədası
Mayın 26-da rusdilli “Exo” qəzetinin son nömrəsi işıq üzü görəcək. “Exo” qəzetini mərhum jurnalist Rauf Talışinski yaradıb. O, mayın 8-də vəfat edib.
1956-cı ildə anadan olan Rauf Talışinski Moskva Dövlət Universitetinin jurnalistika fakültəsini bitirib. “Molodyoj Azerbaydjana”, “Vışka” qəzetlərində çalışıb, “İzvestiya” qəzetinin Azərbaycanda xüsusi müxbiri olub. 1990-cı ildən “Ayna” və “Zerkalo” qəzetlərinin baş redaktoru postunu tutub. 2001-ci ildən “Exo” qəzetinin baş redaktoru idi.
İctimai-siyasi nəşr olan “Exo” qəzeti həftədə 5 dəfə (çərşənbə axşamı, çərşənbə, cümə axşamı və cümə günləri 6 min tirajla, şənbə günləri 10 minə yaxın tirajla) çıxır.
Mayın 23-də Novator.az-a açıqlamasında baş redaktorun birinci müavini Ruslan Manafov bildirib ki, “Exo” maliyyə çatışmazlığı ucbatından fəaliyyətini dayandırmaq məcburiyyətindədir.
“Rauf Talışinskinin salığında da “Exo”nun maliyyə problemi vardımı” sualına cavabında Ruslan Manafov qeyd edib ki, problem olsa belə kollektiv bunu hiss etməyib, çünki qəzetin maliyyə məsələlərinin həlli ilə həmişə mərhum təsisçi məşğul olub.
Ruslan Manafov qəzetin çap versiyasının tam dayanacağını, onlayn versiyasının isə hələlik fəaliyyət göstərəcəyini vurğulayıb. Lakin qəzetin onlayn versiyası kollektivsiz fəaliyyət göstərəcək.
Qəzetin əməkdaşlarının sonrakı taleyinə gəlincə, Ruslan Manafov vurğulayıb ki, “Exo”da böyük təcrübəyə malik jurnalistlər çalışır. Onların bəzisinin təkcə elə “Exo”dakı iş stajı 15 ilə çatır. Bu səbəbdən baş redaktorun birinci müavini əməkdaşların işsiz qalmayacağına ümid edir.
Ruslan Manafov qəzetin hazırkı rəhbərliyinin maliyyə problemləri ilə bağlı Mətbuat Şurasına və Kütləvi İnformasiya Vasitələrinin İnkişafına Dövlət Dəstəyi Fonduna müraciət etmədiyini də söyləyib.
Səidə Hüseynova
